|
Adam Hlobus
* * *
Suchaja trava
cicha šepča pad vietram
pieśniu pra leta.
* * *
Čornaja kaza
žoŭtym vokam zirkaje
na haspadara.
* * *
Ź bieraha kamień
spaŭzaje ŭ vadu vielmi-
vielmi pavolna.
* * *
Kalarovaje
pavietra Estonii
pachnie treskami.
* * *
Daroha ŭ poli,
furmanka, stary čałaviek,
koła skryhoča.
* * *
Metrapaliten,
u čakańni ciahnika
razhladvaju stol.
* * *
Hutarka dziaciej,
chutka i maja dačka
havaryć pačnie.
* * *
Ź lohkim sumam
tryvaju hałaŭny bol,
viasnovy vietryk.
* * *
Samotny hruhan
nizkuju abłačynku
začapiŭ kryłom.
* * *
Śpiłavany suk
na suchi asfalt upaŭ -
bieznadziejny chrust.
* * *
Viečar, park stary,
šorhat starečych krokaŭ,
azirajusia.
* * *
Pierakuleny
śviet u kaluzie žyvie...
Špurlaju kamień.
* * *
Kački i kirli
łunajuć nad vadoju
ciomnaj Śvisłačy
* * *
U piasočnicy
ałaviany sałdacik
pad daždžom zasnuŭ.
* * *
Dzie schavałasia
za viasnovaj smuhoj
majo junactva?
* * *
Sšytak bezavy
nabyŭ, a što zapisać
i nia viedaju.
* * *
Viečar. Miastečka.
Kala kožnaj chaty
ślivy krasujuć.
* * *
Maleńki pakoj,
fotazdymki na ścianie -
tvary znajomych.
* * *
Nabližajucca
chmurynka i maładzik,
addalajucca.
* * *
Atrutny vodar
mahnolii napoŭniŭ
majovuju noč.
* * *
Małady lichtar,
ty, napeŭna, pieršy z nas
pavitajeśsia.
* * *
Redzieńki błakit
i prazrystaja poŭnia
nad dalahladam.
* * *
Kardyjahrama
na stužcy papiarovaj,
doŭhaj, biaskoncaj...
* * *
Hartaju knihu,
nie čytaju, a hladžu
repradukcyi.
* * *
Navalnica, doždž,
płačuć-płačuć lichtary
śvietłymi ślaźmi.
* * *
Hladžu na poŭniu
praz ahieńčyk zapałki -
maleniečkaja.
* * *
Žadańnie zasnuć?
Nie! Žadańnie pračnucca
i nie zasynać.
* * *
Dom nad vadoju...
O, kolki snoŭ viartaje
mianie ŭ hety dom.
* * *
Ty nie havary,
što nia chočaš spać zusim
i nia lubiš son...
* * *
Nalivajecca
lakam ciopłym, załatym
list mahnolii.
* * *
Siońnia čujna spaŭ,
słuchaŭ praź niapeŭny son
šołach daždžavy.
* * *
Znajšoŭ u lesie,
źbirajučy sunicy,
draŭlany huzik.
* * *
Załaty tryśnioh
sieje kropielki rasy
ŭ siniuju vadu.
* * *
Vypaŭzła žabka
z-pad vilhotnych kamianioŭ
muchu ŭpalavać.
* * *
Hładyjołusy,
zachutanyja ŭ marlu,
jeduć na kirmaš.
* * *
Na susiedzki płot
vierabiej pieralacieŭ
ź jabłyni majoj.
* * *
Nievialiki sad,
maładzica bosaja
jabłyk-štryfiel jeść.
* * *
U kalanadzie
pryjemna schavacca -
soniečny ranak.
* * *
Vysokaja stol,
błakitnyja špalery,
sini matylok.
* * *
U maim dvary
sitaŭka błakitnaja
skača pa piasku.
* * *
Ruki kabiety
nad dziciačaj kałyskaju,
čałaviečy śviet.
* * *
Bruicca viecier -
zasypajučy ślady -
piasok bruicca.
* * *
Kala dziaržbanku
na pylnym tratuary
znajšoŭ kapiejku.
* * *
Pa rudoj ścianie
žučok pacichu paŭzie,
leta ažyło.
* * *
Biełaje nieba,
a ŭ im šery matylok
uzdymajecca.
* * *
Na jarkim soncy
kruchmalnyja karunki
firanak śniežnych.
* * *
Pylnyja palmy
vysachłymi listami
ledź-ledź varušać.
* * *
Biełakryłaja
kvietka ventylatara
na vaknie raście.
* * *
Kaviarnia ŭ viežy,
muzyka, mlavaść, kava.
Šery, spakojny dzień.
* * *
Uzdoŭž pryboju,
biazhučna, pa kamieńni
lacić cień kirli.
* * *
Pałasataja
jaščarka sa ściažyny
ŭciakaje ŭ travu.
* * *
Jaki vialiki
list! Nia znojdziecca knihi
taki zasušyć.
* * *
Kolki matylkoŭ
vijecca nad čaromchaj
kala altanki.
* * *
Vysoki komin,
abłoki doŭhija płyvuć,
talinski viecier.
* * *
Dapamahaju
vypaŭźci z-pad listočka
božaj karoŭcy.
* * *
U biełym niebie,
o, jak vysoka, jak šmat
zialonych šyšak.
* * *
Na viejach maich
źnikaje soniečny pył,
viecier u chmarach.
* * *
Śpioka, na dvare
sieli kurycy kupacca
u haračy pył.
|
![[Biełaruski avangard]](../labels/logo.gif){kind=logo}
