|
Adam Hlobus
* * *
Kropla padaje
na lilovy ciomny lod
i płyvie ŭ viasnu.
* * *
Cicha, śnieh idzie,
Tolki kalandar skazaŭ -
nadyjšła viasna.
* * *
Viasnovym rankam
palić u parku śmiećcie
małady sałdat.
* * *
Čornaja lipa,
spavitaja słatoju,
čakaje ciapła.
* * *
Viežy abłokaŭ
nad kamiennaj haroju
zaružavieli.
* * *
Ranica ŭ šybu
cicha pastukałasia...
Para nad kavaj.
* * *
Błakitny ranak,
apranu ŭsio novaje
u honar viasny.
* * *
Pieršy dzień viasny,
treba ŭmyvacca śnieham
z samaj ranicy.
* * *
Ranak, varelnia,
horka-sałodki vodar -
kubačak kavy.
* * *
Łapki jadłoŭca
i praleski na stale
ŭ šklanačcy z vadoj.
* * *
Kapiež, dvorniki
na dachu rydloŭkami
siakuć ledziašy.
* * *
Chvajovy vodar,
kiedravaja ihlica
bliščyć na soncy.
* * *
Staju na viežy
z vybitymi šybami,
nad našym śvietam.
* * *
Nad mohiłkami
chmary płyvuć niaspynna.
Sychodziać śniahi.
* * *
Šukajuć vočy
siarod žoŭtych abłokaŭ
darohi, ptušak.
* * *
Dastaju štodnia
vodar śviežaj hazety
z paštovaj skryni.
* * *
Za vaknom śnieh.
Kubačak haračaj kavy
hatuju sabie.
* * *
Soniečny ranak,
žaŭtavokaja kotka
vyjšła z padjezdu.
* * *
Ranak, park stary,
uźlatajuć hałuby -
ledź čutny vietryk.
* * *
Paralelahram
soniečny na špalerach,
viasnovy ranak.
* * *
Adčyniŭ dźviery -
skraźniak prynios duchmianaść
travy i bezu.
* * *
Šeruju travu
viecier ciopły i suchi
na asfalt prynios.
* * *
Ščyliny ŭ płocie -
pasiečanaje śviatło
lažyć na ziamli.
* * *
Sonca, kapiažy,
ale kaluhi ŭnačy
pavymiarzali.
* * *
Jedu ŭ tramvai,
paŭpustym i chałodnym,
na knižny kirmaš.
* * *
Błakitna-šery
kavałak tynkoŭki
razłomlivaju.
* * *
Parušynačka
trapiła ŭ voka majo -
vokamhnienny bol.
* * *
Z knihaju ŭ ruce
naviedvaju kaviarniu,
nakrapvaje doždž.
* * *
Pieršy dzień, kali
lodu niama na hanku.
Ścichli kapiažy.
* * *
Soniečny nastroj
pa vilhotnym piasku
raźlivajecca.
* * *
Nadychodzić čas
zanieści na śmietnik
zimovyja boty.
* * *
Viecier. Hrud. Viasna.
Jak vurkočuć hałuby
słuchaŭ i maŭčaŭ.
* * *
Šera-žoŭty śnieh
plamami ŭ poli lažyć,
viecier honić pył.
* * *
Šałachnuŭsia kust,
zaščabiatała ptuška...
Iznoŭ cišynia.
* * *
Pobač z darohaj
doŭhija, niežyvyja
truby lažali.
* * *
Suchoje dreva.
Prylacieli vierabji -
poščak, mituśnia.
* * *
Sini aŭtobus
spyniŭsia j pavitaŭsia
z žoŭtym dźmuchaŭcom.
* * *
Kvietačku nabyŭ,
a kamu padaravać
tak i nie znajšoŭ.
* * *
Pasypaŭsia doždž:
na inžyry vierabji
zaščabiatali.
* * *
Iduć nasustrač
ludzi, chavajučy tvary
ad vietru i daždžu.
* * *
Šklanka na stale.
U prazrysta-šery cień
mucha zapaŭzła.
* * *
Cicha, śpić dačka
ŭ pakoi, a za vaknom
drobny doždž idzie.
* * *
Kala bardziuraŭ,
na asfalcie rastajuć
kavałki lodu.
* * *
Byki na bojni:
čornyja ślozy ŭ vačach,
ciažki duch kryvi.
* * *
Staroje dreva
piaščotnyja listočki
paŭpryhožyli.
* * *
Ružovy kamień
na zialonaj travie...
Šukaju słovy.
|
![[Biełaruski avangard]](../labels/logo.gif){kind=logo}
