|
Adam Hlobus
* * *
Basanož idu,
čorna-siniaja ściežka,
ścichaje konik.
* * *
Stručok harochu
zialonaju rybkaju
vyśliznuŭ z ruki.
* * *
Žonka i dačka
śpiać u ciopłaj cišyni,
žnivieński spakoj.
* * *
Rečka ratuje
ad śpioki, ad horyčy
i ad markoty.
* * *
Ciače, šapoča
žvir skroź palcy... U ruce
zastaŭsia kamień.
* * *
Pył na palito,
kala žaleznaj bramy
čakaju brata.
* * *
Iržavy lichtar
śpić pad daždžom u parku,
stojačy śmirna.
* * *
Ruki, rydloŭka,
doždž, dzioran, žvir, kamiani...
Moŭčki pracuju.
* * *
Doždžyk pierastaŭ,
a vada jašče curčyć
z vadaściočnych trub.
* * *
Vułka vuzkaja,
patychaje vilhaćciu
stohadovy bruk.
* * *
Kubačak kavy,
bieły cukrovy kubik,
suchija kvietki.
* * *
U trubach recha
pavialičvaje pamier...
Sens nieparušny.
* * *
Z vačej ciažarnaj
žančyny pahladajuć
dźvie roznyja dušy.
* * *
Ceły Božy dzień
ciažkaja haračynia -
horad zmučyŭsia.
* * *
Abaraniajcie,
čornyja akulary,
chvoraje voka.
* * *
Stoma, zdranćvieńnie,
na skroniach haračy pot,
nie varušusia.
* * *
Nie zdymajučy
achoŭnych akularaŭ,
raźvitvajusia.
* * *
Čapiŭ anuču,
spałochaŭ šałachvosta -
niama spakoju.
* * *
U zielaninie
aranžavyja zory -
kvietki harbuza.
* * *
Kachanka płača,
chavaje tvar za bukiet
hładyjołusaŭ.
* * *
Listok ściskaju -
zialony, tapalovy,
harkavaty sok.
* * *
Zusim niabłaha
lažać i doŭha dumać
pra śpieły ahrest.
* * *
Uspaminaju
dziedaŭ kamienny hanak -
tresnuty žornaŭ.
* * *
Soniečny viečar,
pyłam i hałubami
pachnie haryšča.
* * *
La płytkaj vady
ciopłaj lipieńskaj rečki
pa piasku idu.
* * *
Z dałani na dałoń
pierakidaŭ kamieńčyk
i słuchaŭ chvali.
* * *
Viecier nieznarok
pieraharnuŭ staronku
maleńkaj knihi.
* * *
Karunki šumu
na žvir špurlaje chvala
i ciahnie nazad.
* * *
Sa žmieni ŭ žmieniu
niaspynna i marudna
syplecca žarstva.
* * *
Załacistaja
na vialikaj panivie
rybina lažyć.
* * *
U rudym zbanku
błakitnaje małako,
parožni kubak.
* * *
Stoł. Videlec. Nož.
Pamidory. Ahurki.
Šklanka, sok. Hładyš.
* * *
Astudziŭ śpinu
śviežy, ciopły viatryska -
biezumoŭna, kajf.
* * *
Kust jadłaŭcovy
pad macicovym niebam -
viečny vandroŭnik.
* * *
Viečar, pisk stryžoŭ
praniźlivy, trapiatki
nad ciomnym dvarom.
* * *
Zołata kryžoŭ
płyvie nad kupałami
čužoha chrama.
* * *
Vilnia, cichi dvor,
pad šeraju ścianoju
paparać raście.
* * *
Chłopčyk-akrabat
na čyrvonym dyvanie
stomleny siadzić.
* * *
Stohadovy dom,
i kala jaho ćvituć
hładyjołusy.
* * *
Kaciania dajšło
da vakna ŭ stary padvał
i schavałasia.
* * *
Šera-žoŭtaje
mienskaje nizkaje nieba
krataju rukoj.
* * *
Čornaje nieba,
maŭklivaje čakańnie
ŭ aeraporcie.
* * *
Sybotni viečar,
źbiraju ź nizkaj lipy
ćviet na harbatu.
* * *
Cicha paklikaŭ
kruhłalisty zvanočak
mianie ŭ dziacinstva.
* * *
Idu dachaty,
sałodki lipovy duch
supakojvaje.
* * *
Pad alešynaj,
u zavoinie maŭčyć
miakkaja vada.
* * *
Haračy viecier
pa zialonaj darozie
kocić žoŭty list.
* * *
Kvadra, park stary,
pachnie skošanaj travoj
małady tuman.
* * *
Noč, prysłuchaŭsia -
strakočuć hadzińniki;
ci to koniki...
* * *
Pa-nad sasnoju
poŭni žoŭty dysk płyvie
na chmarach sinich.
* * *
Padaje źnička
za daloki čorny les;
zabyŭ žadańni.
* * *
Płyvuć abłoki
u łaskavaj ciepłyni,
miesiačnaja noč.
* * *
Uspaminaju
dalokaje kachańnie
pad płatanami.
* * *
Čužy, čorny dom.
Biaskoncy hłuchi parkan.
Braznuła klamka.
* * *
Džaz razhojdvaje
karabielny restaran...
Ci naadvarot?
* * *
Kurać i tančać
maładzicy pjanyja.
Viesieła hladzieć.
* * *
Ciomnaja poŭnia
šepty klanovych šataŭ
słuchaje ŭ ciemry.
* * *
Prytailisia,
jak pačvary marskija,
na piasku karčy.
|
![[Biełaruski avangard]](../labels/logo.gif){kind=logo}
